Kjersti Horn ny teatersjef på Det Norske Teatret

I pressemeldinga skriv teatret at dei "har vakse til å bli ein av dei viktigaste scenekunstinstitusjonane i Norden. Kjersti Horn har sett markante kunstnarlege avtrykk i nordisk scenekunst. Dei siste åra har ho opplevd eventyrleg kunstnarleg suksess. Horn har synt seg som ein uredd regissør som med sine eksperimentelle og risikofylte prosjekt har nådd ut til eit stort publikum. På Det Norske Teatret er det særleg arbeida med maratonframsyninga om Kristin Lavransdotter og Edouard Louis' romanar som har vore synlege dei seinare tida."

Dei skriv også at Kjersti Horn tek over som ny teatersjef i eit åremål på fem år i 2025. Ho tar over etter Erik Ulfsby som har vore teatersjef sidan 2011. I meldinga legg teatret vekt på utfordringane for teatersektoren. Horn seier at det "er tøffe tider for teatera og meir enn nokon gong treng dei store institusjonane sterk kunstnarleg leiing, som maktar å forvalte samfunnsoppdraget og produksjonsmidla på ein måte som gjer teateret meir potent og opnar opp for enda fleire. Vi har ei stor oppgåve med å vinne publikums tillit tilbake etter pandemi og uår. Teateret må vere tydeleg på kva vi kan tilby som refleksjonsrom og samhandlingsarena i vanskelege tider. Teateret er eit ikkje-religiøst rom der vi kan treffe kvarandre og tenke over samtida vår, ikkje for å finne dei absolutte svara, men for å tvile, leite og være sårbare, le og gråte, saman."