Nytt studentkull til Det Multinorske

Det Norske Teatret skriver i ei pressemelding at dei under eit styremøte tysdag 14. februar avgjorde at Det Multinorske skal halde fram med eit tredje studentkull med oppstart hausten 2018.

Det Multinorske er eit studietilbod for skodespelarstudentar med familiebakgrunn utanfor Europa, og tilbodet blei etablert ved Det Norske Teatret hausten 2012. Målet er å bygge eit ensemble som speglar det moderne Noreg, skriver Det Norske Teatret. Utdanninga er treårig og leier til ein bachelorgrad. Dei som fullfører studiet får tilbod om praksis med løn på Det Norske Teatret. Studiet blir gjennomført i samarbeid med teaterutdanninga ved Nord Universitet, men undervisninga er i all hovudsak lagt til Det Norske Teatret.

Første kull i skodespelarstudiet avslutta utdanninga si våren 2015 og gjekk inn i ensemblet sesongen etter. Desse er no i jobb ved m. a. Kilden Teater og Konserthus, Hordaland Teater, Sogn og Fjordane Teater, Det Norske Teatret og i film, tv og radio. Neste kull er alt inne i andre året i utdanninga.

1.kull, 2012-15: Sara Khorami, Kadir Talabani, Judy Nyambura Karanja og Thomas Bipin Olsen.

2.kull, 2015-18: Emil Rodrigo Jørgensen, Mimmi Tamba, Peiman Azizpour, Catharina Vu, Kidane Gjølme Dalva, og Amina Sewali.

Legg igjen en kommentar

Din e-postadresse vil ikke bli publisert. Obligatoriske felt er merket med *

 
SISTE SAKER