Ny teatersjef ved Sogn og Fjordane Teater

Stillinga som teatersjef ved Sogn og Fjordane Teater er eit åremål på fire år, og Kvamme tek til i jobben 1.1.2016.

Bodil Kvamme er utdanna ved Universitetet i Bergen, Universitetet i Århus og ved Hochschule für Musikk und darstellende Kunst – Max Reinhardt Seminar. Ho har sidan 1986 arbeidd som frilans dramaturg, og sidan 1998 som sceneinstruktør. Kvamme har vore knytt til produksjonar ved ei rekke institusjonar i Norge, m.a. Agder Teater, Den Nationale Scene, Det Norske Teatret, Nationaltheatret, NRK, Riksteatret, Rogaland Teater og Trøndelag Teater. Ho har sidan 2004 vore dramaturg ved SoFt, og vore den næraste kunstnariske medarbeidaren til dagens teatersjef, Terje Lyngstad.

Ved SoFt har Kvamme hatt regien mellom anna på ”Ishuset” av Marit Tusvik, ”Dama i luka” av Maria Tryti Vennerød og ”My fair lady goes Sogn og Fjordane”, eit stykke ho skreiv saman med Marita Liabø.

Av andre produksjonar Kvamme har vore involvert i kan nemnast ”Hellemyrsfolket” (DNS), ”Draumkvedet” (Det Norske Teatret), ”Raskolnikov” (Riksteatret), ”Kristin Lavransdatter” (Trøndelag Teater), og ”Peer Gynt” (NRK). Seinast i vår hadde Kvamme regien på den kritikarroste framsyninga ”Jeg kommer tilbake i kveld” av Gaute Heivoll, eit stykke som vart ein publikumssuksess ved Agder Teater i Kristiansand.

Styreleiar Håkon Fimland seier i en kommentar at SoFt har fått ein teatersjef med fagleg tyngde og lang og brei røynsle frå arbeid med teater. Kvamme har presentert spennande og nyskapande prosjekt for styret, og Fimland uttalar at det òg er positivt at ho kjenner teatret og fylket godt.