Solrun Toft Iversen blir teatersjef ved Hordaland Teater.
Ny teatersjef for Hordaland Teater
Ifølge ei pressemelding har styret i Hordaland Teater tilsett Solrun Toft Iversen som teatersjef i åremål frå våren 2017 til våren 2021. Solrun Toft Iversen (45) har i ei årrekke vore sjefsdramaturg ved Den Nationale Scene og fungerer per i dag som konstituert teatersjef ved Sogn og Fjordane Teater.
Styreleiar Pål W. Lorentzen seier i meldinga at han er særs nøgd med at Solrun Toft Iversen har takka ja til stillinga.
Ved sida av utdanning frå Universitetet i Bergen og masterutdanning frå Universitetet i Århus, har Solrun Toft Iversen bak seg ein brei og anerkjend kunstnarleg praksis, seier Lorentzen. Han peikar på Toft Iversen si breie erfaring og hennar posisjon i fagmiljøet som sentralt for styret sitt val.
– Eg ser med stor glede fram mot å få leie Hordaland Teater, seier Solrun Toft Iversen som vil vere ansvarleg for repertoaret frå og med hausten 2017.